發夢都想擺脫中共 網民公投撐港獨

發夢都想擺脫中共　網民公投撐港獨
http://hk.apple.nextmedia.com/news/art/20121017/18042539

遙遠而親切嘅 蘇格蘭弟兄，將會喺兩年後舉行一次歷史性嘅獨立公投，全民表決呢個風笛之邦嘅命運。極目望，困惑而徬徨。喺1997年 6月30日 晚上，添馬艦風笛聲中告別英國、回歸中國嘅香港，到底幾時可以自決小島嘅命運呢？

蘇格蘭獨立公投觸發起一班港英餘孽嘅愁思，網上社交平台又再捲起新一輪「 港獨 」公投運動。

喺 facebook，有人發動虛擬公投，提出一個問題：「 假如聯合國以 第1516 號決議案，讓香港人可以重新自決香港的政治前景，你會選出？」四個選擇，包括維持現狀、香港獨立、回歸英國、中華民國（ 台灣 ）接管。
寧做二等公民

一如所料，互聯網確係充斥住顛覆祖國嘅憤青。截至噚日下晝為止，最多人投嘅係「香港獨立，成立香港民主共和國」，以877 票一枝獨秀，票數多過梁振英。第二選擇係「 回歸英國 」（ 200票 ），呢班刁民居然寧願做番殖民地二等公民，都唔肯維持現狀（103票 ），歸順團結、無私嘅人民政府。

曾幾何時係古老王國嘅蘇格蘭，人口只得500萬，仲少過香港，居然學人爭取自行制訂外交同國防政策嘅權力。中共應該盡快出手鬥垮鬥臭佢哋個公投運動，試問若然班格仔人民都可以獨立自主，人心未回歸嘅香港點會唔有樣學樣？

不過講真，阿爺係唔使驚嘅，呢一切都係流於吹水發夢階段，就如一位網民話齋，香港人自己都唔團結，學乜嘢歐洲人搞獨立：「 身處中國南方嘅香港人，有乜嘢？淨係立會選舉叫你香港人盡投泛民都做唔到呀。 」